Helburu bezala itsas ondarea ikertzea, iraunaraztea eta zabaltzea duen ITSAS GELA Elkarteak,  MATER Museoa aurkeztu nahi dizue.

"Kantauriko arrantzaren tradizioan murgil zaitez, MATER euskal atunontziarekin"Arrantza mundu miresgarriaren bizimodua eta arrantzaleen lana azaltzen dizkigun ur-gaineko benetazko Museoa. Itsas ondarearen probetxamenduaren adibide nagusia.

• Euskal itsas kultura eta tradizioa, ontziko instalakuntzen erakusketa eta bere protagonisten memoriaren bitartez.
• Ingurugiroarekin arduratsuak diren hautazko arrantza teknikak

MATER 1990ean eraikia, egurrez egindako azken atunontzia izan zen. Bere baitan biltzen du ontzi tradizionalen ohiko egitura eta horri itsas-ingurunearekiko errespetuzko arrantza-teknikak lotuta, euskaldunen itsas kulturaren adibide aparta bilakatzen dute. Dituen instalazio originalek, batetik, eta barkuaren sotoak erakusketa gune izateko egokitzeak, bestetik, aukera ematen dute Kantauriko arrantza mundu ezezagunean barneratzeko, eta halaber bisitariari itsas-ingurunera hurbiltzeko aukera aparta eskaintzen diote.

Arrantzan aritzeko erabiliko balitz bezala kontserbatzen denez gero, MATER Museoa bisitatzera doanak hurrengoa ikusi ahal izanen du: nola bizi diren gure arrantzaleak, zein kala edo arrantzagunetara joaten diren, zer-nolako tresneria erabiltzen duten... Barkuak gidaturiko ibilbidea eginez gure itsas historiaren zati bat begiztatu daiteke, eta gaur arte izan duen bilakaera, eta halaber egungo egoeraz eta egun dituen arazoez jabetu daiteke. Bere barneko usain gazia sentitzea edo ontziaren kroskoaren aurka uhinen zarata entzutea: esperientzia apartak dira, orain guztion eskura daudenak.

Gainera nabigaziorako baimena izateak ahalbidetzen du museoa porturik portu mugitzea, erakusketa ibiltari gisa. Ildo horretan, estatu guztian itsasontzi bakarra da lehen arrantza egiteko erabilia izanik, gaur egun baimen guztiak dituena itsasora ateratzeko. Horrela MATERek ur-gaineko benetako museoaren izaera finkatzen du, eta aldi berean gainerako museoetatik bereizten da, bide batez bisitari gehiago erakarriz eta kokatua dagoen lurralde historikoaren mugak gaindituz. Ildo horretan itsasoa da gure muga bakarra.